દુઃખ ભૂલી જા, દીવાલ ભૂલી જા,
થઇ જશે તું ય ન્યાલ, ભૂલી જા.
જીવ કર મા ધમાલ ભૂલીજા
એનો ક્યાં છે નિકાલ, ભૂલી જા
જો સુખી થઇ જવું હો તારે તો
જે થતા તે સવાલ, ભૂલી જા
મૌનરહી મિત્રતાનું ગૌરવ કર
કોણે ચાલી'તી ચાલ, ભૂલી જા
રાખ મા યાદ ઘા કોણે કર્યો
તું બન્યો કોની ઢાલ, ભૂલી જા.
ઘેર જઈ ધોઈ નાખ પહેરણ તું
કોણે છાંટ્યો ગુલાબ, ભૂલી જા.
રાસ તારે નીરખવો હોય ખરો
કર બળ્યો કે મશાલ ભૂલી જા.
બે લખી ગઝલ મોથ શું મારી
તારી ક્યાં છે કમાલ, ભૂલી જા.
No comments:
Post a Comment