સમી સાંજનો ઢોલ ઢબૂકતો જાન ઊઘલતી મ્હાલે
કેસરિયાળો સાફો ઘરનું ફળિયું લઇ ને ચાલે.
પાદર બેસી ફફડી ઊઠતી
ઘરચોળાની ભાત.
ડૂસકે ડૂસકે હડસેલાતી
બાળપણની વાત.
પૈડું સિંચતા રસ્તો આખો,
કોલાહલમાં ખૂંપે
શૈશવથી ચીતરેલી શેરી
સૂનકારમાં ડૂબે.
જાન વળાવી પાછો વળતો
દીવડો થર થર કંપે
ખડકી પાસે ઊભો રહીને
અજવાળાને ઝંખે.
સમી સાંજનો ઢોલ ઢબૂકતો જાન ઊઘલતી મ્હાલે
કેસરિયાળો સાફો ઘરનું ફળિયું લઇ ને ચાલે.
-અનિલ જોષી